• კვი. აპრ 11th, 2021

,,ხალხი მაგინებდა, თავს ძალიან შეურაცხყოფილად ვგრძნობდი, უნებლიე შეცდომა არ მაპატიეს” – შოთა არველაძე ნაკრების თამაშს იხსენებს

ლეგენდარული ფეხბურთელი შოთა არველაძე ეროვნულ ნაკრებში 2005 წელს საბერძნეთთან  გამართულ შეხვედრას თავის ავტობიოგრაფიულ წიგნში იხსენებს.

ის შეხვედრა დამოუკიდებელი საქართველოს ისტორიაში  ერთ–ერთი საუკეთესო ფეხბურთელისთვის წარუმატებელი გამოდგა. ქართველმა ე.წ. ქომაგმა კი დიდ ფეხბურთელს ერთი ჩაგდებული მატჩი არ აპატია და შეცვლის დროს სიტყვიერი შეურაცხყოფა მიაყენა.

აი რას წერს ქართული ფეხბურთის ლეგენდა:
,,2005 წლის მარტის ბოლოს ნაკრებს ორი გადამწყვეტი მატჩი ჰქონდა, თან ორივე თბილისში. ჯერ საბერძნეთთან, ოთხი დღის შემდეგ, თურქეთთან.
საბერძნეთთან მატჩისთვის განსაკუთრებულად ვემზადებოდი. სათამაშო პრაქტიკა არ მქონდა, მაგრამ ყველაფერს ვაკეთებდი იმისთვის, რომ მარტის ბოლოს, ასე თუ ისე, კარგ კონდიციაში ვყოფილიყავი. თითქმის ორთვენახევრის უთამაშებელი ვიყავი, მაგრამ ალან ჟირესმა მაინც დამაყენა სასტარტოში.
ყველაფერი კარგად დაიწყო, ასათიანის გოლით დავწინაურდით და ძალიან ორგანიზებულად ვთამაშობდით. ტაიმის ბოლოს, ბერძნების შეტევისას, ჩვენი საჯარიმო მოედნის სიახლოვესთან ბურთი უნდა მომეგერიებინა, მაგრამ ბურთი ფეხზე ამეჭრა და იქვე მდგომ ბერძენ ფეხბურთელს მიუგორდა, ორი წამიც და… ბერძნებმა ანგარიში გაათანაბრეს. მათი გოლი ჩემს შეცდომას მოჰყვა, ჩვენი გუნდი ისე აირ-დაირია, რომ შესვენებამდე ევროპის ჩემპიონებმა კიდევ ერთხელ გაგვიტანეს.
ამას ვერასდროს წარმოვიდგენდი – სტადიონზე მოსული გულშემატკივარი მე მლანძღავდა და თანაც როგორ… ფსიქოლოგიურად ისე ვიყავი განადგურებული, რომ ვერც მეორე ტაიმისთვის მოვიკრიბე ძალა. ჟირესმა მეორე ტაიმის საწყის წუთებში შემცვალა, როცა მოედნიდან გავდიოდი ხალხი მისტვენდა… უშვერად მაგინებდა. თამაშის შემდეგ, თავს ძალიან შეურაცხყოფილად ვგრძნობდი, უნებლიე შეცდომა არ მაპატიეს. მაგრამ, ხალხი ყოველთვის ლიდერებს ადანაშაულებს და ალბათ ასეც უნდა იყოს, უბრალოდ არავინ დამინდო. ეს საკმაოდ რთულად გადასატანი აღმოჩნდა.
თურქებთან მატჩამდე ორი დღით ადრე, ჟირესმა თავისთან მიხმო… მითხრა – გულშემატკივრის რეაქციით ძალიან გაკვირვებული ვარ და თურქეთთან სამატჩო განაცხადში სჯობს არ იყოო. მოდი, ჟურნალისტებს ვუთხრათ, რომ ტრავმა გაქვსო. ძალიან არ მესიამოვნა ასეთი შემოთავაზება. ჟირესს ვუთხარი, რომ ტყუილს არ ვიტყოდი. თამაშის წინა დღეს თბილისიდან წამოვედი და არც დავინტერესებულვარ, რა უთხრა ჟირესმა ჩემზე ჟურნალისტებს. საბერძნეთთან წაგების შემდეგ, თურქეთთან 2-5 წავაგეთ.
წარმატებებს ვუსურვებ საქართველოს ნაკრებს ბერძნებთან მატჩში, პირველი ქულები მათთან უნდა ავიღოთ 🇬🇪❤.- იხსენებს შოთა არველაძე.

PS:სხვადასხვა  ისტორიები ნაკრების შესახებ, შოთა არველაძის  ავტობიოგრაფიულ წიგნში შეგიძლიათ წაიკითხოთ 📚

კომენტარის დატოვება

თქვენი ელფოსტის მისამართი გამოქვეყნებული არ იყო.