საქართველოს ფეხბურთის ფედერაციამ ვაკეში საფეხბურთო ცენტრი გახსნა

საქართველოს ფეხბურთის ფედერაციის ვაკის საფეხბურთო ცენტრი ოფიციალურად გაიხსნა. ცერემონიას ფეხბურთის ფედერაციის პრეზიდენტთან ლევან კობიაშვილთან, ქალაქ თბილისის მერთან კახა კალაძესთან, კულტურის, სპორტისა და ახალგაზრდობის მინისტრის მოადგილესთან სოსო გიორგაძესთან, სპორტის უნივერსიტეტის რექტორთან ჯემალ ძაგანიასთან და სახელმწიფო ქონების ეროვნული სააგენტოს დირექტორთან გიორგი დუგლაძესთან ერთად, ადგილობრივი და აღმასრულებელი ხელისუფლების წარმომადგენლები ესწრებოდნენ.

ახალი საფეხბურთო ცენტრის მოედანზე პირველი ვარჯიში პროექტ #WePlayStrong-ის გოგონების მონაწილეობით გაიმართა.

საფეხბურთო ცენტრის მშენებლობა 2020 წლის დასაწყისში დაიწყო. პროექტის ფარგლებში მოეწყო სტანდარტული ზომის ხელოვნურსაფარიანი საფეხბურთო მოედანი ადმინისტრაციული შენობით, ტრიბუნით, განათებითა და სარბენი ბილიკით.

ახალი საფეხბურთო ცენტრი საქართველოს ფეხბურთის ფედერაციისა და უეფა-ს Hat-Trick-ის პროგრამის დაფინანსებით აშენდა.

ვაკის საფეხბურთო ცენტრის შესახებ კომენტარის სფფ-ის პრეზიდეტმა ლევან კობიაშვილმა გააკეთა:

💬 ​ლევან კობიაშვილი: “ბედნიერი ვარ, რომ დღეს უკვე ოფიციალურად გავხსენით აღნიშნული საფეხბურთო ცენტრი. ეს ინფრასტრუქტურა პირველ რიგში ეკუთვნის ფეხბურთს და იმ ადამიანებს ვინც ამ სპორტის სახეობითაა დაინტერესებული. თუმცა აღნიშნული ცენტრი მხოლოდ ფეხბურთს არ მოხმარდება, ინფრასტრუქტურით სარგებლობა ასევე შეეძლებათ სპორტის უნივერსიტეტს და მის სტუდენტებს.

​ძირითადად, საფეხბურთო ცენტრით ბავშვთა სკოლები, მოყვარულთა და ქალთა საფეხბურთო სკოლები ისარგებლებენ. ეს ინფრასტრუქტურა სწორედ მასობრივი ფეხბურთისთვის იქმნება და ეს ჩვენთვის ძალიან მნიშვნელოვანია.

მსურს, აღნიშნული პროექტის განხორციელებაში ჩართულ ყველა ადამიანს და სტრქუტურას მადლობა გადავუხადო. ასევე მადლობა ვუხდი უეფას, მოგეხსენებათ, რომ ფეხბურთის ფედერაციასთან ერთად, აღნიშნული ცენტრის მშენებლობა Hat-Trick-ის პროგრამით დაფინანსდა.

​მიხარია, რომ ჩვენს ქვეყანას და დედაქალაქს კიდევ ერთი კარგი საფეხბურთო ინფრასტრუქტურა შეემატა. დარწმუნებული ვარ, რომ აღნიშნული პროექტი ხელს შეუწყობს ფეხბურთის განვითარებას და მასობრიობას.”

ვაკის საფეხბურთო ცენტრის გახსნის ცერემონიას ასევე ესწრებოდნენ ფეხბურთის ფედერაციის გენერალური მდივანი, დავით მუჯირი პირველი ვიცე-პრეზიდენტი კახა ჭუმბურიძე და ვიცე-პრეზიდენტი ალექსანდრე იაშვილი.

​საფეხბურთო ცენტრით სარგებლობას უფასოდ შეძლებენ ადგილობრივი საფეხბურთო სკოლები, ქალთა და მოყვარულთა გუნდები. სარბენი ბილიკის გამოყენება ასევე შეეძლება ადგილობრივ მოსახლეობას. აღნიშნული ტერიტორია ფედერაციას 2019 წლის დეკემბერში სახელმწიფო ქონების მართვის ეროვნული სააგენტოსგან გადმოეცა. გადმოცემის პროცესს მხარს უჭერდა სპორტის უნივერსიტეტი.

წყარო: gff.ge