რუსეთში საინტერესო ქართველი მეკარე გამოჩნდა

მიხეილ წულაია, რომელიც “როსტოვში”, ჯერჯერობით, სათადარიგოდ ჰყავთ. გასაგებია, რომ ახლა რუსულ ფეხბურთში სერიოზული კრიზისია უკრაინის წინააღმდეგ აგრესიიდან გამომდინარე საერთაშორისო (ფიფა-უეფა) იზოლაციის გამო, შესაბამისად, რუსეთის ჩემპიონატიც ვეღარ არის ფინანსურად ისეთივე ღონიერი, როგორც 2022 წლამდე იყო.

მაგრამ არც იმდენად დაბალი დონისაა, რომ იქ საინტერესო მოთამაშეები არ იყვნენ. “როსტოვი” ამჟამად რუსული ფეხბურთის ერთ-ერთი ლიდერია – მეორე ადგილზეა ჩემპიონატში. გუნდს ქვეყნის ნაკრების მთავარი მწვრთნელი ვალერი კარპინი ავარჯიშებს, ბოლო ტურში კი “სპარტაკს” მოსკოვში დაუზავდა – 1:1.

კარში რუსეთის ნაკრების მეკარე სერგეი პესიაკოვი იდგა, რომლის შემცვლელიც 18 წლის მიხეილ წულაია გახლდათ – წარმოშობით ქართველი.

მიხეილ დავითის ძე წულაია 2005 წლის 8 თებერვალს როსტოვში დაიბადა. ტანმაღალი (190 სმ) მეკარე იქვე იზრდებოდა და კლუბის აკადემიიდან მთავარ გუნდში 2022 წელს, 17 წლისა დააწინაურეს.

წულაიას საერთაშორისო გამოცდილებაც აქვს – ნათამაშები აქვს რუსეთის 17, 18 და 19-წლამდელთა ნაკრებებში, რაც შემთხვევითი ამბავი ნამდვილად ვერ იქნება.

გარდა ამისა, მან “როსტოვში” სადებიუტო მატჩის ჩატარებაც მოასწრო – 2022 წლის 23 ნოემბერს რუსეთის თასზე “ორენბურგის” წინააღმდეგ ითამაშა.

“ტრანსფერმარკტის” მიხედვით, მისი სატრანსფერო ღირებულება 50 ათასი ევროა. ვფიქრობ, ღირს მასზე დაკვირვება და ყურადღების მიქცევა.