რამდენიმე წუთის წინ დასრულდა იტალიის სერია ა-ს მე-18 ტურის ცენტრალური მატჩი, რომელშიც “ნაპოლიმ” ტურინის “იუვენტუსს” გადაურბინა, ანგარიშით 5:1.
პიემონტელთა რბევა მე-14 წუთზე დაიწყო, როდესაც ხვიჩა კვარაცხელიას მაკრატელა დარტყმა ვოიცეხ შჩესნიმ მოიგერია, დამატებაზე კი ვიქტორ ოსიმენმა ივარგა. 39-ე წუთზე ნიგერიელმა ქართველს ხურდა დაუბრუნა – “პარტენოპეის” უპირატესობა ორბურთიანი გახდა, თუმცა ტაიმის ბოლოს ანხელ დი მარიამ ერთი ბურთი გაქვითა.
რაც შეეხება მეორე ნახევარს, იქ ფეხბურთს მხოლოდ ერთი გუნდი თამაშობდა. 55-ე წუთზე ამირ რაჰმანიმ შეაგდო, აქედან 10 წუთში კი ოსიმენმა დუბლი შეასრულა. ორივე გოლის ასისტენტობა ხვიჩამ გასწია. საბოლოო ანგარიში კი 72-ე წუთზე ელიფ ელმასმა დააფიქსირა.
თუ Whoscored.com-ის შეფასებებს ჩავხედავთ, აღმოვაჩენთ, რომ ყველაზე მაღალი რეიტინგი კვარაცხელიას აქვს. ცნობილი სტატისტიკური სააგენტოსგან 21 წლის გარემარბმა 9.8 ქულა დაიმსახურა.
“ნაპოლის” ფეხბურთელთა შეფასებები შემდეგნაირად გამოიყურება:
მერეტი – 6.6
დი ლორენცო – 7.6
რაჰმანი – 7.7
მინ-ჟაე – 7.4
რუი – 6.7
ანგისა – 6.8
ლობოტკა – 7.1
ჟიელინსკი – 7.0
კვარაცხელია – 9.8
ოსიმენი – 9.4
პოლიტანო – 6.2
შეცვლები:
ოლივეირა – 6.4
ნდომბელე – 6.1
ელმასი – 7.4
ლოსანო – 6.0
შეგახსენებთ, რომ “ნაპოლის” სერია ა-ს სატურნირო ცხრილში 47 ქულა აქვს. გუნდი პირველ პოზიციაზეა და მეორე ადგილზე მყოფ “იუვენტუსს” 10 ქულით უსწრებს.
