fcdinamo.ge – ფრანსის ნზაბა კარიერას “დინამო თბილისში” გააგრძელებს. კონგოს ეროვნული ნაკრების ცენტრალური მცველი თბილისურ კლუბს სტამბოლის “ბაშაქშეჰირიდან” ერთწლიანი იჯარით შეუერთდა.
“დინამოში” გადმოსვლის შემდეგ, ჩვენი გუნდის ახალწვეულმა პირველი კომენტარი გააკეთა: “ბედნიერი ვარ, რომ ასეთი ისტორიული კლუბის წევრი გავხდი. მოტივირებული ვარ, ბევრი ვიშრომო, ყველას ვანახო ჩემი ხარისხი და კლუბს დასახული მიზნების მიღწევაში დავეხმარო.
აქვე მივესალმები “დინამოს” გულშემატკივრებს – თქვენის მხარდაჭერა ჩვენთვის ძალიან მნიშვნელოვანია. მე კი, გპირდებით, რომ ყველაფერს გავაკეთებ თავი საუკეთესოდ წარმოვაჩინო და თქვენთან ერთად წარმატებას მივაღწიო”.
თურქეთის სუპერლიგამდე ფრანსის ნზაბა სამშობლოში ასპარეზობდა, “ბაშაქშეჰირს” კი 2022 წლის ზაფხულში შეუერთდა. ამ პერიოდის განმავლობაში 20 წლის ცენტრალური მცველი სტამბოლური კლუბის ასაკობრივ გუნდებში ასპარეზობდა. მიმდინარე სეზონში კი, მთავარი გუნდის წევრი გახდა და სამ შეხვედრაში მიიღო მონაწილეობა.
რაც შეეხება მის სანაკრებო კარიერას, ნზაბას კონგოს ეროვნულ ნაკრებში ერთი მატჩი აქვს გამართული. ის “დინამოს” თურქულ შეკრებაზე უახლოეს დღეებში შეუერთდება და გუნდთან ერთად 2023 წლის სეზონისთვის მზადებას დაიწყებს.
